ଦେବଗଡ଼ ଜିଲ୍ଲାରେ ଜମି ଅଧିଗ୍ରହଣ ପରେ ଯଥାଚିତ କ୍ଷତି ପୂରଣ ରାଶି ନ ମିଳିବାକୁ ନେଇ ଆଜି ଏକ ଏହି ଆନ୍ଦୋଳନ ଦେଖିବାକୁ ମିଳିଛି। ଯାହା ଫଳ ରେ କିଛି ସମୟ ପାଇଁ ଜାତୀୟ ରାଜପଥ ୪୯ (NH-49) ଉପରେ ଯାତାୟାତକୁ ପ୍ରଭାବିତ ହୋଇଥିଲା । ଦେବଗଡ଼ ଜିଲ୍ଲା ବାରକୋଟ ଥାନା ଅଧୀନ କଲା ଗ୍ରାମରେ ଘଟିଥିବା ଏହି ରାସ୍ତା ଅବରୋଧ ଘଟଣାର ପଛରେ ଦୀର୍ଘଦିନର ଅସନ୍ତୋଷ ଓ ନିରନ୍ତର ଦାବି ଥିବା ଜଣାପଡ଼ିଛି।
ସୂଚନା ଅନୁଯାୟୀ, କଲା ଗ୍ରାମର ମୃତ କାଞ୍ଜୁ ନାଏକଙ୍କ ପରିବାର ସଦସ୍ୟମାନେ କଲା ଦୁର୍ଗା ମନ୍ଦିର ପାଖରେ NH-49 ଉପରେ ରାସ୍ତା ଅବରୋଧ କରିଥିଲେ। ଏହି ଅବରୋଧ କିଛି ସମୟ ପର୍ଯ୍ୟନ୍ତ ଚାଲିଥିଲା, ଯାହାର ଫଳରେ ଯାତାୟାତରେ ବାଧାବିଘ୍ନ ସୃଷ୍ଟି ହୋଇଥିଲା ଓ ଦୁଇପଟେ ଗାଡ଼ିର ଲମ୍ବା ଲାଇନ୍ ଲାଗିଯାଇଥିଲା।
କଣ ଥିଲା ଏହି ଆନ୍ଦୋଳନ ର ମୂଳ କାରଣ
ଏହି ଆନ୍ଦୋଳନର ମୂଳ କାରଣ ହେଉଛି ଜାତୀୟ ରାଜପଥ ସମ୍ପ୍ରସାରଣ କାମ ସମୟରେ ତାଙ୍କର ଜମି ଓ ଘରବାରି ଅଧିଗ୍ରହଣ ହୋଇଥିବା ସତ୍ତ୍ୱେ ମଧ୍ୟ ସେମାନେ ଏପର୍ଯ୍ୟନ୍ତ କ୍ଷତି ପୂରଣ ରାଶି ପାଇନଥିବାରୁ ଘଟିଛି ଏହି ବିରୋଧ । ପରିବାର ପକ୍ଷରୁ ଦାବି କରାଯାଇଛି ଯେ, ଗତ କିଛି ବର୍ଷ ଧରି ସେମାନେ ବାରକୋଟ ତହସିଲ କାର୍ଯ୍ୟାଳୟକୁ ବାରମ୍ବାର ଯାଇଥିଲେ ମଧ୍ୟ କୌଣସି ସ୍ପଷ୍ଟ ସମାଧାନ କିମ୍ବା କ୍ଷତିପୂରଣ ଅର୍ଥ ପାଇ ପାରିନଥିଲେ। ପରିବାର ସଦସ୍ୟମାନଙ୍କ କହିବା ଅନୁସାରେ, ପ୍ରଶାସନ ତରଫରୁ ପ୍ରତିଥର କେବଳ ଆଶ୍ୱାସନା ମିଳୁଥିଲା, କିନ୍ତୁ ତାହା ପ୍ରକୃତ ଭାବେ କୌଣସି ଫଳ ଦେଖାଯାଇନଥିଲା। ଏହିପରି ଭାବେ ଦୀର୍ଘ ସମୟର ଅପେକ୍ଷା ଓ ନିରାଶା ଶେଷରେ ସେମାନଙ୍କୁ ଏହି ପ୍ରତିବାଦ ମାର୍ଗକୁ ବାଛିବାକୁ ବାଧ୍ୟ କରିଥିବା କୁହାଯାଉଛି।
ଘଟଣା ବିଷୟ ରେ ଅବଗତ ହେବାପରେ କଣଥିଲା ପୋଲିସ ଆଉ ପ୍ରଶାସନ ର ପଦକ୍ଷେପ
ଘଟଣା ବିଷୟରେ ସୂଚନା ମିଳିବା ସହିତ ବାରକୋଟ ଥାନା ପୋଲିସ ଓ ଜାତୀୟ ରାଜପଥ (NH) କର୍ତ୍ତୃପକ୍ଷ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ସେମାନେ ପରିବାର ସଦସ୍ୟଙ୍କ ସହିତ ଆଲୋଚନା କରି ପରିସ୍ଥିତିକୁ ସମ୍ଭାଳିବା ସହିତ ଶୀଘ୍ର ସମାଧାନ କରିବାକୁ ପ୍ରତିଶ୍ରୁତି ଦେଇଥିଲେ। ପ୍ରଶାସନ ପକ୍ଷରୁ ଯଥାଶୀଘ୍ର କ୍ଷତିପୂରଣ ରାଶି ଦେବାକୁ ପଦକ୍ଷେପ ନିଆଯିବ ବୋଲି ଆଶ୍ୱାସନ ଦେବା ପରେ ପରିବାର ସଦସ୍ୟମାନେ ରାସ୍ତା ଅବରୋଧ ହଟାଇଥିଲେ ଓ ପରିସ୍ଥିତି ପୁଣି ସାଧାରଣ ହୋଇଯାଇଥିଲା।
ଏହି ଘଟଣା ପୁଣିଥରେ ଜମି ଅଧିଗ୍ରହଣ ସମସ୍ୟା ଓ କ୍ଷତିପୂରଣ ପ୍ରଦାନ ପ୍ରକ୍ରିୟାରେ ଥିବା ଅବ୍ୟବସ୍ଥାକୁ ପ୍ରକାଶ କରିଛି। ଏପରି ଘଟଣା ଆଗକୁ ନ ହେବା ପାଇଁ ସରକାର ଓ ସମ୍ପର୍କିତ ବିଭାଗ ଦ୍ରୁତ ଓ ପ୍ରଭାବଶାଳୀ ପଦକ୍ଷେପ ନେବା ଆବଶ୍ୟକ।
ଏହି ଘଟଣା କୁ ନେଇ କଣ କହୁଛନ୍ତି ସ୍ଥାନୀୟ ଜନ ସାଧାରଣ
ସ୍ଥାନୀୟ ଲୋକମାନେ ମଧ୍ୟ ଏହି ଘଟଣା ପରେ ପ୍ରଶାସନଙ୍କୁ ଅନୁରୋଧ କରିଛନ୍ତି ଯେ, ଯେଉଁ ମାନଙ୍କ ଜମି ଅଧିଗ୍ରହଣ ହୋଇଛି ସେମାନଙ୍କୁ ସମୟରେ ନ୍ୟାୟସଙ୍ଗତ କ୍ଷତିପୂରଣ ଦିଆଯାଉ। ନହେଲେ ଆଗାମୀ ଦିନରେ ଏପରି ପ୍ରତିବାଦ ଆହୁରି ବୃଦ୍ଧି ପାଇବାର ଆଶଙ୍କା ବଢିବ। ଶେଷରେ , କାଞ୍ଜୁ ନାଏକଙ୍କ ପରିବାର ଦ୍ୱାରା କରାଯାଇଥିବା ଏହି ରାସ୍ତା ଅବରୋଧ ଘଟଣା ଏକ ଗୁରୁତ୍ୱପୂର୍ଣ୍ଣ ବାର୍ତ୍ତା ଦେଇଛି ଯେ, ଲୋକମାନଙ୍କର ଅଧିକାର ଓ ନ୍ୟାୟ ଦାବିକୁ ଅବହେଳା କରିହେବ ନାହିଁ। ପ୍ରଶାସନ ଏହାକୁ ଗଭୀରତାର ସହ ନେଇ ଶୀଘ୍ର ସମାଧାନ କରିବା ଆବଶ୍ୟକ।
Jagruti Live Media is one of the fastest-growing digital news channels in Odisha, widely recognized for its trusted and impactful journalism. With the tagline “Odisha Mati Ra Khabara”, the platform delivers authentic and timely news across politics, entertainment, sports, national and international affairs, exclusive interviews, viral stories, and breaking updates.
Dedicated to bringing the voice of the people to the forefront, Jagruti Live Media has set a new benchmark in digital journalism through credible reporting, fast news delivery, and audience-focused storytelling across multiple platforms.
