ଆନନ୍ଦପୁରରେ ଆରମ୍ଭ ହେଲା ଭାଇଚାରା ଓ ସାଂସ୍କୃତିକ ଏକତାର ମହାପର୍ବ ଆନନ୍ଦପୁରମହୋତ୍ସବ

କଳା, ସଂସ୍କୃତି ଓ ଐତିହ୍ୟର ଅଦ୍ଭୁତ ସମନ୍ୱୟ ନେଇ ଆୟୋଜିତ ଏହି ଆନନ୍ଦପୁରମହୋତ୍ସବ ଆଗାମୀ ଛଅ ଦିନ ଧରି ଆନନ୍ଦପୁର ଷ୍ଟାଡିୟମ୍ ପରିସରରେ ଧୁମଧାମରେ ପାଳନ ହେବ। ସ୍ଥାନୀୟ ଆନନ୍ଦପୁର ବାସୀ ଙ୍କ ମଧ୍ୟରେ ଏହାକୁ ନେଇ ବିଶେଷ ଉତ୍ସାହ ଓ ଆନନ୍ଦର ପରିବେଶ ଦେଖାଦେଇଛି। ମହୋତ୍ସବର ଉଦ୍ଘାଟନୀ ଅବସରରେ ଧାର୍ମିକ ଓ ପାରମ୍ପରିକ ରୀତିନୀତିକୁ ଗୁରୁତ୍ୱ ଦିଆଯାଇଥିଲା।

ଆନନ୍ଦପୁରମହୋତ୍ସବ ଅବସରରେ ଆୟୋଜିତ ଭବ୍ୟ ମଶାଲଶୋଭାଯାତ୍ରା

ପ୍ରଥମେ ଘସିପୁରା ସ୍ଥିତ ଝାଡେଶ୍ଵର ମନ୍ଦିର ପରିସର ରୁ ଏକ ଭବ୍ୟ ମଶାଲ ଶୋଭାଯାତ୍ରା ଆରମ୍ଭ ହୋଇଥିଲା। ଏହି ଶୋଭାଯାତ୍ରା ସହରର ମୁଖ୍ୟ ସଡକ ଦେଇ ବିଭିନ୍ନ ସ୍ଥାନ ପରିକ୍ରମା କରିବା ପରେ ଶ୍ରୀଶ୍ରୀ ଦଧିବାମନଜୀଉ ଙ୍କ ମନ୍ଦିର ପରିସରକୁ ପହଞ୍ଚିଥିଲା। ସେଠାରୁ ପୁନର୍ବାର ମଶାଲ ଶୋଭାଯାତ୍ରା ଆନନ୍ଦପୁର ଷ୍ଟାଡିୟମ୍ ପର୍ଯ୍ୟନ୍ତ ନିଆଯାଇ ମହୋତ୍ସବ ମଞ୍ଚରେ ସ୍ଥାପନା କରାଯାଇଥିଲା। ଏହି ପାରମ୍ପରିକ ଆୟୋଜନ ମହୋତ୍ସବକୁ ଏକ ଗଭୀର ସାଂସ୍କୃତିକ ମାନ୍ୟତା ପ୍ରଦାନ କରିଛି।

ମହୋତ୍ସବ ଉଦ୍ଘାଟନୀ ଅବସରରେ ଅତିଥି ମାନଙ୍କ ଯୋଗଦାନ

ଉଦ୍ଘାଟନୀ ଉତ୍ସବରେ ବିଭିନ୍ନ ପ୍ରମୁଖ ଅତିଥିମାନଙ୍କର ଉପସ୍ଥିତି ମହୋତ୍ସବର ଗୌରବ ବଢ଼ାଇଥିଲା। ବାଚସ୍ପତି ସୁରମା ପାଢ଼ୀ ମୁଖ୍ୟ ଅତିଥି ଭାବେ ଯୋଗ ଦେଇ ମହୋତ୍ସବକୁ ଉଦ୍ଘାଟନ କରିଥିଲେ। ସେଠାରେ ଘସିପୁରା ବିଧାୟକ ବଦ୍ରି ନାରାୟଣ ପାତ୍ର ଓ ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ। ତାଙ୍କର ଉପସ୍ଥିତି ଓ ଉତ୍ସାହବର୍ଦ୍ଧକ ଉଦବୋଧନ ଆୟୋଜକ ଓ ଦର୍ଶକମାନଙ୍କୁ ଅଧିକ ପ୍ରେରିତ କରିଥିଲା। ଏହି ମହୋତ୍ସବର ଆଗାମୀ ଦିନଗୁଡିକ ମଧ୍ୟ ଅତ୍ୟନ୍ତ ଆକର୍ଷଣୀୟ ହେବାକୁ ଯାଉଛି। ଆଇନ ମନ୍ତ୍ରୀଙ୍କ ଠାରୁ ଆରମ୍ଭ କରି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଙ୍କ ପର୍ଯ୍ୟନ୍ତ ଅନେକ ଶୀର୍ଷ ନେତୃତ୍ୱ ଏହି ମହୋତ୍ସବରେ ଯୋଗ ଦେବାକୁ ସ୍ୱୀକୃତି ପ୍ରଦାନ କରିଛନ୍ତି। ତାଙ୍କର ଆଗମନ ମହୋତ୍ସବର ଗରିମାକୁ ଆହୁରି ବଢ଼ାଇବ ବୋଲି ଆଶା କରାଯାଉଛି। ଆନନ୍ଦପୁର ଷ୍ଟାଡିୟମ୍ ପରିସରରେ ଏହି ମହୋତ୍ସବ ପାଇଁ ଏକ କୋଳାହଳପୂର୍ଣ୍ଣ ଓ ଉତ୍ସବମୁଖର ପରିବେଶ ସୃଷ୍ଟି ହୋଇଛି। ସୁନ୍ଦର ମଞ୍ଚ, ଆଲୋକ ସାଜସଜ୍ଜା ଓ ସୁନିୟୋଜିତ ବ୍ୟବସ୍ଥାପନା ଦର୍ଶକମାନଙ୍କୁ ଆକର୍ଷିତ କରୁଛି।

ସାଂସ୍କୃତିକ କାର୍ଯ୍ୟକ୍ରମ, ନୃତ୍ୟ, ନାଟକ ହେବ ପରିବେଷିତ

ପ୍ରତ୍ୟେକ ଦିନ ସନ୍ଧ୍ୟାବେଳେ ରାଜ୍ୟ ଓ ରାଜ୍ୟ ବାହାରର ନାମକରା କଳାକାରମାନଙ୍କ ଦ୍ୱାରା ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଉଛି। ସଙ୍ଗୀତ, ନୃତ୍ୟ ଓ ନାଟକ ମାଧ୍ୟମରେ ସଂସ୍କୃତିର ବିଭିନ୍ନ ରୂପକୁ ପ୍ରଦର୍ଶିତ କରାଯାଉଛି। ଏହି ମହୋତ୍ସବ କେବଳ ଏକ ସାଂସ୍କୃତିକ ଆୟୋଜନ ନୁହେଁ, ବରଂ ଏହା ଏକ ଭାଇଚାରା ଓ ସାମୁଦାୟିକ ସମ୍ପର୍କକୁ ମଜବୁତ କରିବାର ଏକ ମାଧ୍ୟମ। ସ୍ଥାନୀୟ କଳାକାର ମାନଙ୍କୁ ତାଙ୍କର ପ୍ରତିଭା ପ୍ରଦର୍ଶନର ଏକ ବଡ଼ ମଞ୍ଚ ମିଳୁଛି। ସେହିପରି, ବାହାରର କଳାକାରମାନଙ୍କ ଆଗମନ ଦ୍ୱାରା ସଂସ୍କୃତିର ଆଦାନ-ପ୍ରଦାନ ହେଉଛି। ସବୁ ଦୃଷ୍ଟି ରୁ ଦେଖିବାକୁ ଗଲେ , ଆନନ୍ଦପୁର ମହୋତ୍ସବ ଏକ ଅନନ୍ୟ ଉତ୍ସବ ଭାବେ ପରିଚିତ ହେଇଛି, ଯାହା କଳା, ସଂସ୍କୃତି ଓ ଐତିହ୍ୟକୁ ଏକତ୍ର କରି ସମାଜକୁ ଏକ ମଞ୍ଚରେ ପ୍ରଦର୍ଶନ କରୁଛି । ଆଗାମୀ ଦିନଗୁଡିକରେ ଏହା ଆହୁରି ବିଶାଳ ରୂପ ନେବା ସହ ଅଧିକ ଲୋକଙ୍କୁ ଆକର୍ଷଣ କରିବ ବୋଲି ଆଶା କରାଯାଉଛି।